ЕБС-ийн сурагчдын дунд хаягдал зай цуглуулах хайрцаг зохион бүтээх уралдаан зарлагдлаа

БОАЖ-ын сайд Н.Цэрэнбат Ерөнхий боловсролын сургуулиудын дунд, ахлах ангийн сурагчдыг байгаль дэлхийгээ хамгаалах үйлсэд уриалан дуудаж, цаашлаад гэр бүлийнхэндээ эх дэлхийгээ хайрлах, хамгаалах үйлсийг түгээн, таниулах зорилготойгоор “Ногоон пасспорт” санаачилгыг эхлүүллээ. 

Энэхүү санаачилгын хүрээнд БОАЖЯ, тус яамны харьяа Цэнгэг усны нөөц, байгаль хамгаалах төв, Нийслэлийн боловсролын газар, Нийслэлийн байгаль орчны газартай хамтран ерөнхий боловсролын сургуулиудын дунд, ахлах ангийн сурагчдын дунд  “Хаягдал зай цуглуулах хайрцагны загвар зохион бүтээх уралдаан” зарлаж байгаагаа хэвлэлийн бага хурал зарлан мэдээллээ.

БОАЖЯ-ны харьяа Цэнгэг усны нөөц, байгаль хамгаалах төвийн захирал Г.Номин: “Ногоон пасспорт” санаачилгын хүрээнд зарлаж буй энэхүү уралдаанд Нийслэлийн Ерөнхий боловсролын дунд, ахлах ангийн сурагчид эко клуб байгуулан оролцох боломжтой. Хүүхдүүд маань хаягдал зай цуглуулах хайрцаг хийснээрээ бусдадаа хогоо ангилж хаях дадал, зуршлыг бий болгох эхлэлийг тавьж байгаагаараа онцлогтой" гэлээ. 

Уралдаанд оролцох бүтээлийг 2018.03.15-ны өдрийн 17.30 цагаас өмнө БОАЖЯ-ны харьяа Цэнгэг усны нөөц, байгаль хамгаалах төвд хүлээн авна. 

Шагналын сан: 

  • I байрт орсон клуб 1 сая,
  • II байр эзэлсэн клуб 500 мянган төгрөг,
  • III байр эзэлсэн клуб тусгай шагнал хүртэнэ.

“Ногоон пасспорт” санаачилгад нэгдэж, идэвхитэй оролцсон нэг эко клубыг жилийн эцэст ижил төрлийн үйл ажиллагаа явуулдаг гадны улсын эко клубын туршлагатай танилцуулах үйл ажиллагааг зохион байгуулахаар бэлтгэж байгаа гэнэ.  Үүнээс гадна эко клубын хүүхдүүд  “Ногоон пасспорт” санаачилгын хүрээнд ямар ажил хийхээ өөрсдөө тодорхойлох бөгөөд энэ сарын 17-нд “Олон улсын хүүхдийн Найрамдал” төвд болох Эко клубуудын чуулга уулзалт болох ажээ. 

Энэхүү санаачилгыг БОАЖ-ын сайд Н.Цэрэнбат Засгийн газрын мөрийн хөтөлбөрийн дагуу  хүүхэд залуусын хүмүүжил, төлөвшилд эергээр нөлөөлөх бодлогын хүрээнд байгаль хамгаалах ажилд бүх нийтийн оролцоог хангах, ёс заншлаа дээдэлсэн, байгальд ээлтэй зөв дадлыг төлөвлшүүлэх ажлын хүрээнд эхлүүлж байгаа юм байна. Тэрбээр байгаль орчин, аялал жуулчлалын салбарт “Хандлагаа өөрчилье” багц ажлыг эхлүүлэх бөгөөд өсвөрийн байгаль хамгаалагчдыг бэлтгэх “Ногоон пасспорт” санаачилга нь нэгээхэн хэсэг нь юм.