Н.Марал 
У.Хүрэлсүх: Сэхээнд байсан эдийн засгийг энгийн тасагт шилжүүллээ, 2018 онд гэрт нь авчирна
Төрийн ордонд Ерөнхий сайд У.Хүрэлсүх танхимын гишүүдийнхээ хамт 100 хоногийн ажлын үр дүнгийнхээ талаар хэвлэлийн бага хурал хийж байна.
Тэрээр "Эрхэм хүндэт ард иргэд ээ. Монгол Улсын эдийн засгийн нөхцөл байдал сэргэж байна гэж дүгнэж болно.
2017 онд эдийн засгийн 4 хувийн бодит өсөлт гарлаа. Өвөг дээдсийнхээ байгуулсан эртний түүхт улсынхаа хувь заяаг бид дампуурлаар шийдэж болохгүй. Тийм учраас ОУВС-тай хамтран ажиллах сонголт хийсэн. Энэ сонголт зөв байж ээ гэдэг нь харагдаж байна. Мүүдиз агентлаг Монголын эдийн засгийг C зэрэглэлээс B зэрэглэл рүү оруулсан. Энэ нь манай эдийн засаг сайжирч байгаагийн нотолгоо.
2017 онд төсвийн орлого 500 тэрбум төгрөгөөр давж биеллээ. Гадаад валютын нөөц 3.2 тэрбум ам.доллар болсон байна. Цаашид төгрөгийн ханш чангарах төлөв харагдаж байгаа.
Аж үйлдвэрийн салбарын нийт үйлдвэрлэл 2017 онд 3 их наяд төгрөгөөр нэмэгдсэн. Гадаад худалдааны тэнцэл 19.7 хувиар ашигтай гарсан байна.
Малын тоо толгой өссөн. 66.2 сая малтай болж 4.2 саяар нэмэгдсэн байна. 2017 онд бид 27.8 мянган тонн мах экспортолж 137 тэрбум төгрөгийн орлого олжээ.
2017 онд бид Хөгжлийн банкны 580 сая ам.долларын өрийг төлж барагдууллаа. Мөн Чингис бондын 500 сая ам.долларыг төллөө.
Бид сэхээний тасагт байсан эдийн засгийг энгийн тасагт шилжүүллээ. 2018 онд бид эдийн засгийг эмнэлгээс гаргаж гэрт нь авчрах, 2019 онд ажилд нь оруулах хэрэгтэй.
Бид дан ганц уул уурхайг шүтсэнээс болж эдийн засаг түүхий эдийн бүтээгдэхүүн дагаад унадаг. Дээр нь хоёр хөрш болон олон улсын байгууллагуудад нэр хүнд унасан маань бидний зовлон. Бид оношоо тогтоосон тул эмчлэх ёстой. Зовлонгийн шалтгаанаа засаж залруулах нь Шинэ Засгийн газар бодлого.
Ингэхийн тулд хоёр зүйл дээр анхаарч ажиллана.
Нэгдүгээрт, төрийн албаны санхүүгийн сахилга батыг тогтоох явдал чухал байна. Юуны түрүүнд бид сахилга хариуцлагаа сайжруулах хэрэгтэй.
Хоёрдугаарт, Эдийн засгийн уналтыг зогсоох. Энэ хоёр зорилт бол Засгийн газрын гол зорилт юм.
Монгол гэдэг айл жилдээ 6 төгрөг олж 8.50 төгрөг зардаг байна. Хоёр төгрөгөө гадаад дотоодын тусламж зээлээр бүрдүүлдэг. Тиймээс төсвийн алдагдалгүй болох нь хамгийн чухал. Тиймээс санхүүгийн сахилга батыг тогтооно. Цаашлаад гадаадад, дотоодын өр зээлээ нимгэлж өрийн дарамтнаас гарна.
Иргэдээ эх оронд нь эрүүл саруул амьдруулахад таван зүйл шаардлагатай.
1.Эрүүл хүнсээр хангах
2. Гэр, орон орон сууцаар хангах
3. Боловсрол, мэргэжил эзэмшүүлэх
4. Ажилтай, орлоготой болгох
5. Эрүүл мэндийг нь хамгаалах
Гадаад, дотоодын өр ширийг дарахад үндэсний үйлдвэрлэгчдийн үүрэг их байгаа гэдгийг зориуд тэмдэглэн хэлье.
Урд өмнөх Засгийн газруудын сайн сайхан хийж бүтээсэн зүйлийг нь үргэлжлүүлж, алдааг нь засна.
Гурван тулгуурт хөгжлийн бодлогыг манай Засгийн газар боловсруулж дууслаа. Бид энэ талаар та бүхэнд дахин мэдээлэл хийнэ.
Монгол хүн эх орондоо айх аюулгүй, гэдэс цатгалан, сэтгэл амар амьдрах ёстой. Үүний төлөө Монголын төр засаг ажиллах ёстой.
Одоо бид тавантолгойгоо ашиглах цаг болсон.
Эрүүл биетэй, саруул ухаантай, ажилтай, орлоготой, ирээдүйтэй итгэлтэй Монгол хүн эх орондоо амьдрах ёстой. Үүнийг бүрдүүлэх нь Засгийн газрын үүрэг.
Ингэхийн тулд ард иргэдээ эрүүл хүнс, гэр орноор хангах, боловсрол эзэмшүүлэх, ажилтай орлоготой болгож, эрүүл мэндийг нь хамгаалах ёстой.
Монгол Улс хөгжлийн замд явахдаа хос эдийн засагтай болох ёстой. Үүний нэг нь уул уурхай, нөгөө нь хөдөө аж ахуй юм.
20 жил ярьсан энэ ажлыг эхлүүлэх Засгийн газар бол энэ засгийн газар
Гуравдугаарт, Нефтийн хангамжийн асуудал:
Бид олон жил нефт боловсруулах асуудлыг ярилаа. Дийлэнхи цаасан дээр яригдсаар байгаад үлдлээ. Зарим нь цаасан дээрч буугаагүй Тэгвэл одоо энэ асуудлыг ярих биш ажил хэрэг болгоё. Нефтийн хангамжийг сайжруулахын тулд бид дотооддоо нефть боловсруулах үйлдвэр байгуулна.
20 жил ярьсан энэ ажлыг эхлүүлэх Засгийн газар бол энэ засгийн газар
Монгол Улс жилдээ 1.1 сая тонн шатахуун хэрэглэдэг. Үүний 98 хувийг ОХУ-аас, 2 хувийн БНСУ болон БНХАУ-аас авдаг.
Бид тусгаар тогтносон улс. Хүнс, эрчим хүч, нефтиэ дотооддоо хангах ажлыг бид хийнэ.
Таван толгойг бид цогцоор нь авч үзэх ёстой. Энэ асуудлыг Засгийн газрын хуралдаанаар оруулахаар яамны сайд бэлтгэж байгаа. УИХ дээр эцсийн байдлаар шийдэгдэнэ.
Одоо бид Таван толгойгоо ашиглах цаг болсон. Олон жил ярьлаа".
2019 оны 4 дүгээр сараас эхлээд Улаанбаатар хот руу ахуйн зориулалттай түүхий нүүрс оруулахгүй.
Хууль гаргана. Батлагдана гэж би бодож байна.
Жилийн өмнө хэллээ. Ард иргэд, ААН-үүд минь бэлтгэлээ сайн хангаарай. Ингэж чадвал Улаанбаатарын утаа дор хаяж 50 хувь багасна.
Эхний ээлжинд нүүрс боловсруулах үйлдвэр байгуулна.
Хоёрдугаарт эрчим хүч, цахилгаан, гаазаар хангана.
Гуравдугаарт хамгийн гол арга орон сууцжуулна".
Эцэст нь та бүхэнд нэг асуудлыг хэлье. ОУВС-ийн төлөөлөгчид бид дөрвөн асуудлыг ярилцлаа.
Нэгдүгэээрт, Эрэгтэй 60, эмэгтэй 55 насандаа өөрийн хүсэлтээр тэтгэвэрт гарах хүсэлтийг нээхээр боллоо. Өөрөөр хэлбэл сонголт хийх боломжийг нь нээж өгөхөөр боллоо. Монгол хүний дундаж наслалт 67 болсон. Тийм учраас зарим нь эрт тэтгэвэрт гарахыг хүсэхгүй байна. Мөн тэтгэврийн насыг жилд 6 сараар нэмж байсныг 3 сараар нэмэхээр боллоо.
Хоёрдугаарт, ХХОАТ-ын 4 шатлалыг зогсоолоо, 1 шатлалтай болголоо. Хуучнаараа үлдэж байна гэж ойлгож болно. 1 сард төлсөн татварыг буцааж олгоно".
Гуравдугаарт, цалин нэмэх асуудал. 2019 он цалин тэтгэмжийг нэмнэ.
Дөрөвдүгээрт, Хүүхдийн мөнгөний хамрагдалт 60 хувь байгааг 80 хувь болгохоор ярилцаж байна.
Энэ мэт асуудлуудыг ОУВС-тай бид ярилцаж байна. Ард иргэдий амьдрал хэрэг болохуйц шийдвэр гарна гэж бодож байна. Ард иргэдийн санаа сэтгэлийг зовоож байгаа асуудлуудыг бид шийдвэрлэнэ. Монгол улсын эдийн засаг сэргэж байна. Санхүүгийн сахилга бат чангарч байна гэж үзэж байна. Одоо манай засгийн газарт 880 хоног байна. Үлдсэн хоногуудыг бид үр дүнтэй өнгөрөөе гэж бодож байна.
Энэ Монгол улсад эв нэгдэл хамгийн чухал. Өнгөрсөн 27 жилд бид бие биенээ доош хийж, өрсөлдсөн. Сонгуулийн үедээ л өрсөлдөж бусад үед улс орныхоо төлөө ажиллацгаая. Бид нар дайснууд биш. Бид нар нэг л Монгол улс.