Н.Марал 
Улсын дээд шүүхийн Иргэний хэргийн танхимд өнөөдөр МАХН-ын дүрмийн өөрчлөлт болон шинээр сонгогдсон даргыг бүртгэх тухай хүсэлтийг хэлэлцэнэ. Хуралдааны илтгэгч шүүгчээр П.Золзаяа оролцох бөгөөд 10.30 цагаас эхлэх юм байна.
МАХН-ын II Их хурлыг УИХ-ын гишүүн О.Баасанхүү, Нийслэлийн МАХН-ын хорооны дарга Г.Бямбасүрэн нарын гишүүд өнгөрсөн сард зарлан, Төрийн ордонд зохион байгуулсан билээ. Тус хурлаар оролцогчдын 94.4 хувийн саналаар УИХ-ын гишүүн О.Баасанхүүг МАХН-ын даргаар сонгосон юм. Тиймээс уг шийдвэрийг үндэслэн МАХН-ын дүрмийн өөрчлөлт болон шинээр сонгогдсон даргыг бүртгүүлэхээр Улсын Дээд шүүхэд хүсэлт гаргаж, энэ сарын 5-нд хэлэлцэхээр товлосон юм. Гэвч УИХ-ын гишүүн О.Баасанхүү материалтай бүрэн танилцаж амжаагүй гэсэн шалтгаанаар шүүх хуралдааныг хойшлуулсан юм.
Харин МАХН-ын дарга Н.Энхбаяр, дэд дарга С.Ганбаатар нар уг шийдвэрийг эсэргүүцэж, О.Баасанхүү гишүүний зарлан хуралдуулсан их хурлыг хүчин төгөлдөр бус гэж үзэж буй.
Улсын дээд шүүх хэрхэн шийдэхээс МАХН-ын даргын асуудал тодорхой болох юм.