Эрдэнэт үйлдвэрийн Цахилгааны цехийн хамт олон өнгөрсөн оныхоо амжилтаа бататган, хөрөнгө оруулалт бүтээн байгуулалтын ажлаа үргэлжлүүлж байна. Техник технологийн шинэчлэлийн хүрээнд Баяжуулах үйлдвэрийн Хаягдлын аж ахуйн Ил хуваарилах байгууламжид ТДНС-10000 мВа хүчин чадалтай, 35 кВ-ын трансформаторыг сольж, их засвар хийхээр төлөвлөжээ. Тус цехэд 2019 онд Казахстан улсад үйлдвэрлэгдсэн шинэ трансформатор нийлүүлснээр 30 гаруй жилийн насжилттай, үйл ажиллагаа нь доголдож аваарын байдалтай байсан хоёр трансформаторыг сольж, ээлжээр засварлах боломж бүрдсэн. Үүний үр дүнд саяхан тус цехийн ажилчид өөрсдийн хүчээр Хаягдлын аж ахуйн дэд станцын 35кВ-ын Ил хуваарилах байгууламжид байрлаж буй трансформаторыг сольж дууссан байна. Одоо хоёр дахь трансформаторын их засварын ажлыг эхлүүлээд байна.
Ирэх 5 дугаар сард, гадна байрладаг Ил хуваарилах байгууламжийн өндөр хүчдэлийн тоног төхөөрөмжийн засварын ажил хийгдэж эхэлнэ. Үүнтэй холбоотойгоор ЦРП-7,10 зэрэг 35 кВ-ын дэд станцад ОХУ-ын ЗЭТО компанид үйлдвэрлэсэн элегазын орчин үеийн технологи бүхий өндөр хүчдэлийн таслуур болон хуурай салгууруудыг суурилуулах ажлыг төлөвлөж байна.
