БНСУ-д CoVid19 вирусийн халдвар гаднаас орж ирэх тохиолдлын тоо тасралтгүй өсөж байгаа тул дөрөвдүгээр сараас 1-нээс эхлэн хилээр орж ирж байгаа гадаад, дотоодын бүх хүнийг 14 хоног тусгаарлахаар болжээ.
Өнөөдөр өглөөний байдлаар тус улсад CoVid-19-ийн 105 шинэ тохиолдол бүртгэгдэж, нийт 9583-д хүрчээ гэж БНСУ-ын Өвчний хяналт, урьдчилан сэргийлэх төв (KCDC) мэдээллээ. Амиа алдсан хүний тоо наймаар нэмэгдэж 152 болжээ.
Шинэ халдварын тоо хоёр долоо хоногоос 100 орчим болсон боловч импортын тохиолдол тогтмол өсч байгаа нь эрх баригчдыг хорио цээрийн дэглэмээ чангатгахад хүргэсэн аж.
Хөл хорионы шинэ захирамжийн дагуу тус улсад ирэх бүх хүн лхагва гарагаас эхлэн харьяаллаас үл хамааран 14 хоногийн турш тусгаарлагдах ёстой. Үүнд орон нутгийн хаяггүй иргэд өөрсдийн зардлаар төрийн зориулалттай байгууламжид үлдэх аж. Тусгаарлах байрны төлбөр хоногт 100 мянган вон.
