Цахим ертөнц дэлхий нийтээр хөгжсөн өнөө үед манай монгол залуус ч гэсэн хөл нийлүүлэн алхаж явна. Үүний нэг тод илрэл нь “Ворлд Плас Дижитал” ХХК-ийн Ай ТИ программ зохион бүтээгч залуусын бүтээсэн World Plus (W+) аппликейшн өнөөдөр Япон улсын Токио хотноо “Империал” (Imperial) зочид буудлын их танхимд нээлтээ хийж байна.
World Plus (W+) аппликейшн нь одоогийн байдлаар монгол, англи, япон, хятад, малайз, индонез гэсэн 6 хэл дээр гарч байгаа бөгөөд олон улсын шилдэг сэтгүүл болох Vogue, GQ, Men’s Health, BBC Earth, Top Gear гэх мэт дэлхийд алдартай 78 сэтгүүл нэгдээд байна.
Цаашдаа дэлхийн сэтгүүлүүдийг нэг дор багтааж, зуу зуун сая хэрэглэгчтэй болно гэсэн өндөр амбиц, том хүсэл мөрөөдөлтэй залуусын дижитал платформ юм. Тус W+ аппликейшнийг нь дэлхий нийтийн энэ салбарынхны анхааралд нэгэнтээ өртөж, түүгээр ч зогсохгүй цаашид дэвжиж хөгжих ирээдүйтэй платформын дунд дээгүүрт тооцогдож байгаа юм.
World Plus (W+) аппликейшныг гар утас, ай пад, таблет зэрэг хүн бүрийн гарын доорх төхөөрөмжөөр ашиглаж болдгоороо давуу талтай. Хамгийн орчин цагийн дижитал сэтгүүлийн стандарт, чанарын шаардлагыг хангасан, татах хурд, өнгө, дүрс, дуу авиа мөн хамгаалалтын системээрээ гайхагдаж байна.
