"Apple"-ийн дэлхий даяарх нийлүүлэлтээрээ 14 жилийн дараа анх удаа "Samsung"-ийг гүйцэж түрүүлжээ. "Apple" энэ онд дэлхийн өнцөг булан бүрт 243 сая бүтээгдэхүүн нийлүүлсэн бол "Samsung" 235 саяыг нийлүүлсэн байна. Түүнчлэн дэлхийн ухаалаг гар утасны зах зээлийн 19.4 хувийг "Apple", 18.7 хувийг "Samsung" эзэлж байна.
Энэ нь жижиглэнгийн сувгуудад нийлүүлсэн бүтээгдэхүүний тоог хэлж байгаа болохоос борлуулалтыг тооцоогүй тоо гэсэн үг юм. Гэхдээ энэхүү тооцоолол нь ухаалаг гар утасны эрэлт болон хүлээлт ямар байгааг харуулж байгаа болов уу.
"Apple"-ийн энэхүү амжилтыг есдүгээр сард нээлтээ хийсэн "iPhone 17" цувралтай холбон ойлгож байна. Цувралын борлуулалт эхний дөрвөн долоо хоногийн хугацаанд "iPhone 16"-г бодвол 12 хувиар их байжээ. Гэхдээ үүнд "iPhone 16e"-г тооцоогүй. "Apple"-ийн нэн чухал зах зээл болох Хятад улсад мөн хугацаанд "iPhone 17"-ийн борлуулалт өмнөх цувралаасаа 18 хувиар их байжээ.
Түүнчлэн "iPhone 17" худалдаанд гарсан үе нь хэрэглэгчийн худалдан авалтын ерөнхий мөчлөгтэй таарч байгаа аж. Тодруулбал, Covid-19 цар тахлын үеэр шинэ утас худалдан авсан хүмүүсийн утсаа солих хугацаа нь яг өдийд таарч байгааг "Counterpoint Research"-ийн ахлах шинжээч Ян Ван хэллээ.
"Apple" брэнд 2029 он хүртэл тэргүүн байраа хадгалах төлөвтэй байгааг ч мөн шинжээчид онцолжээ.
