Н.Марал 
Эрүүл мэндийн сайдын баталсан удирдамжийн дагуу ЭМЯ, НЭМГ-ын хамтарсан ажлын хэсэг дүүргийн эмнэлгүүдийн тусламж үйлчилгээ, томуу, томуу төст өвчний үед авч хэрэгжүүлж буй арга хэмжээ, бэлэн байдалтай танилцаж байгаа юм. Тус удирдамжийн дагуу Баянгол, Чингэлтэй дүүргийн эрүүл мэндийн төв болон Сүхбаатар, Баянзүрх, Хан-Уул, Сонгинохайрхан дүүргийн нэгдсэн эмнэлэгүүдэд өнгөрсөн өдрүүдэд ажиллажээ.
Баянгол дүүрэгт
Тус дүүргийн эрүүл мэндийн төв нь нийт батлагдсан хүүхдийн 200 ортойгоос сүүлийн тоогоор 308 хүүхэд хэвтэн эмчлүүлж байна. Нэмэлтээр хүүхдийн 108 орыг дэлгэн зохицуулалт хийжээ. Мөн хүүхдийн нэгдсэн эмнэлэг болон Ахмадын эмнэлгийн Хүүхдийн II тасгийн өрөө тус бүрт ХЕПА шүүлтүүр бүхий агаар цэвэршүүлэгч төхөөрөмжийг ажиллуулж буй нь дотоод орчны агаарын бохирдол болон амьсгалын замын халдварт өвчлөлөөс хамгаалах нөхцөл бололцоог бүрдүүлж өгсөн байна.
Чингэлтэй дүүрэгт
Эрүүл мэндийн төв нь нийт батлагдсан хүүхдийн 80 ортойгоос 174 орчим хүүхэд хэвтэн эмчлүүлж байна. Нэмэлтээр хүүхдийн 96 орыг дэлгэн зохицуулалт хийжээ. Мэдрэлийн тасгийн 40 ор, нөөцөөс 60 орыг хүүхдийн оронд шилжүүлж, Физик эмчилгээний өрөө, Сэргээн засах болон ажилчдын амралтын өрөө, Хүүхдийн тоглоомын өрөө зэрэг нөөц орон зайд ор дэлгэсэн аж.
Тус эрүүл мэндийн төвийн даргын тушаалаар Удирдлагын зөвлөлийн гишүүд, халдвар судлаач нар дэмжлэгт хяналтыг өдөр бүр хийж томуу, томуу төст өвчнөөс урьдчилан сэргийлэх үйл ажиллагааг зохион байгуулж байгаа юм.
Сүхбаатар дүүрэгт
Нэгдсэн эмнэлэг нь нийт батлагдсан хүүхдийн 125 ортойгоос 195 хүүхэд хэвтэн эмчлүүлж байна. Насанд хүрэгчдийн болон Мэдрэлийн тасгийн 20 ор, нөөцөөс 50 орыг хүүхдийн оронд шилжүүлжээ.
Баянзүрх дүүрэгт
Тус дүүргийн нэгдсэн эмнэлэг нь нийт батлагдсан хүүхдийн 230 ортойгоос сүүлийн тоогоор 224 хүүхэд хэвтэн эмчлүүлж байгаа ба харьцангуй ачаалал багатай байгаа юм.
Сонгинохайрхан дүүрэгт
Тус дүүргийн нэгдсэн эмнэлэг нь нийт батлагдсан хүүхдийн 165 ортойгоос 280 хүүхэд хэвтэн эмчлүүлж байна. Нэмэлтээр хүүхдийн 115 орыг дэлгэн зохицуулалт хийжээ.
Хан-Уул дүүрэгт
Дүүргийн нэгдсэн эмнэлэг нь нийт батлагдсан хүүхдийн 80 ортойгоос сүүлийн байдлаар 318 хүүхэд хэвтэн эмчлүүлж байна. Сувилагчийн өрөө, Физик эмчилгээний өрөө, Хүүхдийн тоглоомын өрөө зэрэг нөөц оронд зайд нийт 238 орыг дэлгэн ажиллуулж байгаа аж.
Дүүргийн эрүүл мэндийн төвүүд "Хүүхдийн кабинет”-ийг ажлын өдрүүдэд 17:00-22:00цаг хүртэл, Бямба гарагт 10:00-16:00 цаг хүртэл уртасгасан цагаар, мөн томуу, томуу төст өвчний зөвлөгөө өгөх утас ажиллуулж байна. Түүнчлэн ӨЭМТ-ийн гэрийн эргэлт үзлэгийг идэвхжүүлжээ.
Нийслэлийн хэмжээнд хүүхдийн 977 орыг ажиллуулж, нэмэлтээр 895 орыг дэлгэж, нийт 1,872 орон дээр томуу, томуу төст өвчтэй хүүхдийг хэвтүүлэн эмчилж байгаа талаар ЭМЯ мэдээлэв.
Эх сурвалж: ЭМЯ