Н.Марал 
Нийслэлийн Багануур дүүрэгт улсын төсвийн хөрөнгө оруулалтаар шинээр 320 хүүхдийн хүчин чадал бүхий бага сургуулийн барилгыг хугацаанаас нь өмнө ашиглалтад оруулжээ. Тус сургуулийг нийслэлийн Засаг даргын 2018 оны 08 дугаар сарын 02-ны өдрийн А/703 тоот захирамжаар Багануур дүүргийн 125 дугаар сургуультай нэгтгэн “Оюуны эрин” цогцолбор сургууль болгон өргөжүүлж, 104 багш, ажилтан, албан хаагчтай, 1,056 суралцагчтайгаар үйл ажиллагаа явуулж эхэлсэн байна.
Багануур дүүргийн 125 дугаар сургууль нь 2014 онд Дэлхийн банкны санхүүжилтээр баригдаж 64 багш, ажилтан, 640 хүүхдийн хүчин чадалтай үйл ажиллагаагаа эхэлж байсан.
Цогцолбор сургуулийн барилгын ажлыг хоёр тэрбум 764.8 сая төгрөгийн нийслэлийн хөрөнгө оруулалтаар “Мөнхийн үргэлжлэл” ХХК-ийн хамт олон хийж гүйцэтгэсэн байна.
Нээлтийн үйл ажиллагаанд нийслэлийн Нийгмийн хөгжлийн асуудал хариуцсан төслүүдийн удирдагч-Нийслэлийн Засаг даргын орлогч Ш.Анхмаа, нийслэлийн Боловсролын газрын орлогч дарга Л.Дашдэмбэрэл, Багануур дүүргийн Засаг дарга Ц.Сандаг-Очир, дүүргийн Засаг даргын орлогч дарга Т.Отгонбаяр, дүүргийн Иргэдийн Хурлын дарга С.Даваасүрэн болон дүүргийн сургуулийн захирлууд, эцэг эхийн төлөөлөл оролцсон байна.
Цогцолбор сургуулийн захирал Г.Бат-Эрдэнэ “Шинэ сургууль маань үеийн үед бяцхан шавь нарынхаа ирээдүйг чиглүүлэгч, эрдмийн өргөө болон цэцэглэн хөгжих болтугай. “Хүүхэд нэг бүрийг хөгжүүлэх” бодлогыг чанартай хэрэгжүүлэхийн тулд бидний хамт олон итгэл зүтгэл, сэтгэлээрээ нэгдэн ажиллах болно” гэж онцоллоо.