Н.Марал 
Нийслэлийн ИТХ-ын ээлжит XX хуралдааны II хэлэлцүүлгийн үдээс хойших хуралдаанаар төлөөлөгчид нийслэлийн Засаг дарга бөгөөд Улаанбаатар хотын захирагч С.Батболд болон холбогдох албан тушаалтнуудаас асуулт асууж, хариулт авч, саналаа хэлж хэлэлцүүлгээр үргэлжиллээ.
Тухайлбал, хотын захиргааны шинэ байр барих зардлаас 20 тэрбум төгрөгийг хасах асуудлаар нийслэлийн ИТХ дахь АН-ын бүлгээс санал гаргасан боловч төлөөлөгчид дэмжсэнгүй. Мөн нийслэлийн 380 жилийн ойг тэмдэглэх зардалд гурван тэрбум төгрөгийн өртөг бүхий ажил хэрэгжүүлэхээр тусгасныг хурал дахь МАН-ын бүлэг 2.5 тэрбум төгрөг болгож бууруулах санал гаргасныг дэмжив.
Нийслэлийн орон сууцны хөтөлбөрт туссан 10 тэрбум төгрөгийг дөрөв болгон бууруулах МАН-ын бүлгийн санал дэмжигдсэн юм.
Ирэх оны нийслэлийн төсвийн төсөлд Нийгмийн бодлогын хорооны саналаар шинээр нэмж тусгахаар төлөвлөсөн сургуулийн автобусны хэрэгцээнд зарцуулах 300 сая төгрөгийн санал дэмжигдлээ. Харин “Уншлагыг дэмжих 2021” төслийн хүрээнд хүүхэд залуучуудад ном унших боломжийг бүрдүүлэх ажилд 250 сая төгрөгийг нэмж тусгах саналыг төлөөлөгчид дэмжсэнгүй.
Төсөв батлахын өмнө нийслэлийн ИТХ-ын төлөөлөгч Д.Баттулга Төрийн сан болон төсөв хариуцсан албан тушаалтнаас төсөлд оруулж буй өөрчлөлтүүд нийт төсвийн орлого, зарлагын хэмжээнд нийцэж байгаа, эсэхийг лавласан юм. Нийслэлийн ЗДТГ-ын Санхүү, төрийн сангийн хэлтсийн дарга Э.Ганхүү хариулахдаа “Төлөөлөгчдийн хэлэлцэж байгаа орлогын өөрчлөлтүүд нь орлогын балансаа барьж байгаа, ямар нэг байдлаар зөрүү үүсэх асуудал байхгүй” гэв.
Ингээд нийслэлийн ИТХ-ын ээлжит ХХ хуралдаанаар ирэх оны төсвийг баталлаа. Ирэх жилийн Нийслэлчүүдийн нийт орлого 796.1 тэрбум, үүнээс татварын орлого 628.4 тэрбум, татварын бус орлого 144.5 тэрбум, тусламжийн орлого 23.1 тэрбум байх юм. Харин Хотын шуудын 2019 оны төсвийн жилд зарцуулах зарлага 609.3 тэрбум төгрөг байна. Мөн нийслэлийн төсвөөс 2019 оны Улсын төсөв шилжүүлэх орлогын хэмжээг 289.1 тэрбум төгрөг байхаар тогтоолд тусгалаа.
Эх сурвалж: Нийслэлийн ИТХ-ын ХМОНХТ