Улаанбаатар-Дархан чиглэлийн замын шинэчлэлийн бүтээн байгуулалтын ажлын талаар ЗТХ-ийн дэд сайд Л.Халтар мэдээлэл өглөө.
Тэрбээр "Дарханы замын тавдугаар багцын дөрвөн урсгалтай замын суурь хучилт бүрэн дууссан. Наймдугаар сарын 17-ны өдрийн байдлаар уг замын шинээр барьсан хоёр эгнээ замын өнгө хучилтын ажил 8 орчим километрт хийгдэж байна. Суурь хучилтын зузаан 5 см, өнгө хучилт мөн 5 см тавигдана. 408 километр энэхүү зам дээр өнгө хучилт хийгдэх ёстой.
Дархан чиглэлийн замын 4 болон хоёрдугаар багцад өнгө хучилт эхэлсэн.
Уг замын суурь хучилтын ажил сүүлийн 204 километрээс 32 километр дутуу байна. Хучилтыг ойрын үед хийчихвэл Дархан-Улаанбаатар чиглэлийн дөрвөн урсгалтай, 408 км замын суурь хучилт үндсэндээ дуусах юм. Цаг агаарын саатал гарахгүй бол 32 км замын суурь хучилт болон бусад өнгө хучилт зэрэг ажлуудаа есдүгээр сарын сүүлчээр дуусгахаар ажиллаж байна" хэмээн ярилаа.
Дарханы замыг шинэчлэх бүтээн байгуулалтын ажлыг таван багцад хуваан гүйцэтгэж байгаа.
I багц - Улаанбаатараас баруун аймаг салах тойрог уулзвараас Хар модот давааны ар хүртэлх 37.26 км,
II багц - Хар модот давааны араас Урьхан хүртэл 45.5 км,
III багц Урьханаас Сүмбэр хүртэлх 45.74 км,
IV багц Сүмбэрийн уулзвараас Цайдамын хөндий хүртэлх 45.08 км,
V багц Цайдамын хөндийгөөс Дарханы тойрог уулзвар хүртэлх 30.53 км авто зам.
