Хүүхдийн мөнгөн тэтгэмжтэй холбоотой асуудлаар Засгийн газрын хэрэг эрхлэх газрын дарга Д.Амарбаясгалан, Сангийн сайд Б.Жавхлан, Цахим хөгжил, харилцаа холбооны сайд Н.Учрал, Үндэсний статистикийн хорооны дарга Б.Батдаваа нар мэдээлэл хийлээ.
Цахим хөгжил, харилцаа холбооны сайд Н.Учрал" Өчигдөр E-mongolia системийн ачаалал ердийн үеийнхээс 10-20 дахин нэмэгдсэн. Тиймээс систем ачааллаа даахгүй байдалд хүрч гацсаныг хүлээн зөвшөөрч байна. Иймд цаашид цахим системд шинэчлэл хийж сайжруулахаар ажиллана. Мөн энэ хүрээнд төр иргэдийн хувийн мэдээллийг хамгаалж өрх, дүүрэг төрийн байгууллагын мэдээллийн солилцоог сайжруулна. Өрхийн мэдээллийн сан хаяг дээр суурилдаг. Хаяг дээр байсан өмнөх хүмүүсийн мэдээлэл давхардаж гарч ирж байгаа асуудал гарсан. Иймд иргэдийн тусламжтайгаар өрхийн мэдээллийг сайжруулж мэдээллийг зохих түвшинд нь шинэчлэх хэрэгтэй байгаа" гэв.
Сангийн сайд Б.Жавхлан" Хүүхдийн мөнгийг зорилтот бүлгүүдэд анх 20 мянган төгрөгөөр олгодог байсан. Улмаар цар тахлын үед хүүхдийн мөнгөөр дамжуулж өрхийн орлогыг дэмжих байдлаар 100 мянган төгрөг болгож нэмэгдүүлсэн. Үүнийг иргэдийн зүгээс халамж хавтгайрлаа гэдэг. Гэвч хүүхдийн мөнгийг татвар төлөгчдийн мөнгөөр санхүүжүүлдэг. Иймд энэ оноос эхлэн нийт хүүхдийн 91 хувьд л хүүхдийн мөнгө олгох бодлогын шилжилт хийсэн. Сүүлийн гурван жилийн турш өрхүүд хүүхдийн мөнгө авч дадал болсон. Иймд шууд хасах нь иргэдэд хүндрэлтэй. Тиймээс өрхийн сарын орлого нь 3.5 саяас дээш бол хүүхдийн мөнгө өгөхгүй байх зохицуулалт хийсэн. Зарим өрхүүдийн хувьд бүртгэлтэй холбоотой асуудал үүссэн. Мэдээллийн зөрүүг Цагаан сараас өмнө залруулахаар ажиллана. Улмаар хоёрдугаар сар гарсан бол нэгдүгээр сарын хүүхдийн мөнгийг нь нөхөж өгнө. Түүнчлэн Цагаан сарын баяр болох гэж байгаа учраас гуравдугаар сарын мөнгийг урьдчилж нэг дор өгөхөөр бэлтгэлээ хангаж эхэлсэн" гэлээ.
