Хууль зүй, дотоод хэргийн сайд Засгийн газраас өнөөдөр гаргасан шийдвэрийг танилцууллаа.
Сайд Х.Нямбаатар “Нүүрсний хулгайн хэрэгтэй холбогдуулан мөрдөн шалгах ажиллагаанд дэмжлэг үзүүлэх ажлын хэсгийг өнөөдөр байгуулахаар боллоо. Тус ажлын хэсгийг миний бие ахална.
Бид эхний ээлжид БНХАУ-ын Гаалийн байгууллагаас шаардлагатай мэдээллийг гаргуулахаар төлөвлөсөн.
Одоогийн байдлаар нүүрсний хулгайн хэрэгтэй холбогдуулан дараах чиг үүргийн дагуу шалгалтын ажиллагаа явуулж байна.
Үүнд:
Эрдэнэс Тавантолгойн нүүрсний гэрээний үнэ болон гэрээ байгуулахдаа бусдад давуу байдал олгосон гэх асуудлыг тогтоох баг ажиллаж байна.
Бүртгэлгүй машинаар уртын болон богинын зайд нүүрс тээвэрлэсэн мэдээллийг шалгаж байна.
Төмөр замын бүтээн байгуулалттай холбоотой гэрээний бичиг баримтуудыг шалгаж байгаа. Олон нийтийн зүгээс офтэйк гэрээг ил болго гэж шаардсан. Хуулийн дагуу гэрээнд оролцсон талуудын саналыг авсны үндсэн дээр гэрээг ил болгох эсэхийг шийднэ.
Нүүрсний хулгайн хэрэгтэй холбогдуулан Монгол Улсын хилээр бүртгэлгүй бараа тээврийн хэрэгсэл гарсан эсэхийг Хил хамгаалах ерөнхий газар, Гаалийн ерөнхий газар шалгаж байгаа.
Нүүрс тээврийн ажиллагаанд 9,000 орчим тээврийн хэрэгсэл оролцдог. Тэдгээрийн эцсийн өмчлөгчдийг олж тогтоохоор ажиллаж байна.
ЗГХЭГ-ын дарга Д.Амарбаясгалан болон миний бие гадаа гарч, мөрдөн шалгах ажиллагааны талаар жагсагчдад мэдээлэл өгнө.
Түүнчлэн Ерөнхий сайд мөрдөн шалгах ажиллагааны ажлын хэсгийг өргөтгөж, орон нутгийн эрүүгийн цагдаагийн албадтай хамтарч ажиллах үүрэг өгсөн” хэмээн мэдээллээ.
Мөн тэрбээр “Нүүрсний хулгайн хэрэгтэй холбоотой хүмүүсийн тоо нэмэгдэх хандлагатай байна. Энэ талаар эргээд мэдээлэх болно.
Нэг иргэн өнгөрсөн наймдугаар сард Гашуунсухайт хилийн боомтоор бүртгэлгүй нүүрс гаргасан талаар шүгэл үлээсэн. Үүнийг шалгахад нэг ээлжийн бүх алба хаагч хамтарсан нь тогтоогдсон.
Олон талт шалгалтын үр дүнд хулгайд алдагдсан нүүрсний нийт үнийн дүн, байгууллагын хулгайд алдсан нүүрсний хэмжээ болон гэрээний мэдээллүүдийг ил болгоно.
Түүнчлэн Ерөнхий сайд Эрүүгийн хэрэг хянан шийдвэрлэх тухай хуульд нэн даруй өөрчлөлт оруулах чиглэл өгсөн. Ирэх долоо хоногт хуулийн төслөө өргөн барина.
Мөрдөн шалгах ажиллагааны явцад хэргийн оролцогчдоос маш их хүсэлт гаргаж цаг хожих, шүүх хурлыг хойшлуулж, улмаар хөөн хэлэлцэх хугацаа дуусгавар болдог байсан.
Энэ байдлыг халахын тулд хүсэлт хангах үйл ажиллагааг хялбар, шуурхай явуулах зарчимд нийцүүлэн өөрчлөлт оруулна” гэсэн юм.
