Л.Энх-Амгалан: Цэцэрлэгийн барилга төлөвлөөгүй орон сууцыг улсын комисс хүлээж авахгүй

Засгийн газрын ээлжит хуралдаан өнөөдөр /2022.11.09/ боллоо. Хуралдаанаас гаргасан шийдвэрийн талаар зарим сайд нар мэдээлэл хийж байна.

Энэ үеэр Боловсрол, шинжлэх ухааны сайд Л.Энх-Амгалан, “Өнөөдрийн Засгийн газрын хуралдаанаар боловсролын салбартай холбоотой хоёр асуудлыг танилцуулж, хэлэлцлээ. Нэгт, цаашид цэцэрлэгийн хүртээмжийн асуудлыг яаж тогтвортой барих вэ гэдэг асуудлыг шийдвэрлэлээ. Энэ жил 124 мянган хүүхдийг цэцэрлэгт хамруулсан. Гурван удаагийн элсэлт хийсэн. Үндсэндээ өнөөдрийн байдлаар Улаанбаатар хотод 752 орон сууцны цогцолбор баригдаж байна. Тэгэхэд 20-хон цэцэрлэг барихаар төлөвлөж байна гэх судалгаа бий. Тиймээс цэцэрлэгийн барилга төлөвлөөгүй орон сууцны хорооллыг ашиглалтад хүлээж авахгүй, хүлээж авсан албан тушаалтанд хариуцлага тооцох ажлыг зохион байгуулна” гэжээ.