М.Саран 
Горхи-Тэрэлжийн Байгалийн Цогцолборт газар нь Улаанбаатар хотын ундны цэвэр усны нөөцийн эх үүсвэрээс гадна аялал жуулчлалын гол бүс нутаг билээ.
Жилдээ гадаадын 30000, дотоодын 200000 орчим аялагч, жуулчид тус бүс нутгаар аялдаг бөгөөд нийслэлд хамгийн ойрхон, дэд бүтэц сайн хөгжсөн байгалийн үзэсгэлэнт газрын нэг юм.
Аялагчид нэмэгдэхийн хирээр байгалийн бохирдол, хур хог үүсэх асуудал сүүлийн жилүүдэд нэмэгдсэн ба энэхүү асуудалтай холбоотой хогны бохирдолтыг бууруулах ажлыг эрчимтэй хэрэгжүүлж байгаа билээ.
Бидний санаачилсан тус ажилд M-Cи-Эс Кока-Кола компани байгаль хамгаалах чиглэлээр 2005 оноос эхлэн дэмжлэг үзүүлж хамтран ажиллаж байгаа ба тус компани нь байгаль орчинд хоргүй, хурдан уусдаг нано технологиор хийгдсэн хогны уутыг бэлтгэн аялал жуулчлал ихтэй бүсүүдэд хандивлаж байгаа нь маш үр дүн өндөртэй ажил болж байна.
2005 оноос хойш жил бүр байгальд ээлтэй био хогны уутыг жил бүрийн 3-5 сард хүлээлгэн өгдөг сайхан уламжлал тогтсон билээ. 2018 оны эхний ээлжийн био хогы уутаа өнгөрөгч долоо хоногт хүлээж авч гадаад дотоодын жуулчиддаа 1 цэг дээрээс үнэ төлбөргүйгээр тарааж эхэллээ.
Энэхүү био хогны уут нь 5 кг хог даах чадвартай бөгөөд Горхи-Тэрэлжийн Байгалийн цогцолборт газарт зорчиж буй гадаад, дотоодын аялагч жуулчидад зориулан Туул гүүрний постоор дамжин өнгөрөх тасалбарын хамт тараагдах ба аялагчид аяллын туршид бий болгосон хог хаягдлаа тус уутанд цуглуулан Улаанбаатар хотын төвлөрсөн хогийн цэг дээр хаях үүргийг хүлээх юм.
Эх дэлхийгээ хамгаалах “ЭЕРЭГ” үйлсэд нэгдэж, байгаль дэлхий, гол горхио ббохирдлоос сэргийлж, түүх соёлын дурсгалын өлгийн нутаг, байгалийн өвөрмөц тогтоцтой Горхи-Тэрэлжийн БЦГ-ын экологийн тэнцвэрт байдал, биологийн төрөл зүйл, унаган байдлыг хадгалан хамгаалж хойч үеийнхэндээ өвлүүлэн үлдээх эрхэм нандин хариуцлагаа ухамсарлан хогоо хогийн цэгт хаяж заншаарай.