Н.Марал 
Согтууруулах ундаа хэрэглэсэн жолооч нэг дор олон машинтай мөргөлдсөн хэрэг өчигдөр Хүүхдийн ордны хойд зам дээр гарсан билээ. Үүнтэй холбогдуулан Замын цагдаагийн газраас мэдээлэл хийлээ.
"Lexus" маркийн авто машины жолооч А нь "Land Criuser" авто машинтай Э, "Axio" авто машинтай Б, "Prius" авто машинтай Д, "Carina" авто машинтай T, "Forester" авто машинтай M, "Prius" авто машинтай Ц, "Prius" авто машинтай Б, "Prius" авто машинтай М, "Crown" авто машинтай Х, "Prius" автомашинтай С, "Crown" авто машинтай Д нарын нийт 11 авто машинтай мөргөлдсөн.
Тэрээр осол гаргах үедээ согтууруулах ундааны зүйл хэрэглэсэн /Др:2.07 хувь/ үедээ тээврийн хэрэгсэл жолоодсон байжээ. Зам тээврийн осол, хэргийн шалтгаан дундаас хамгийн их хохирол учруулдаг тэргүүн шалтгаануудын нэг нь согтуугаар тээврийн хэрэгсэл жолоодох явдал юм. Учир нь, согтууруулах ундааны зүйл хэрэглэсэн хүн жолоодох чадвараа алдаж, орчиндоо өрнөж байгаа зүйлийг тусгахаа больж, ядарч байгаагаа мэдэхгүй болдог байна. Согтуурлын эхний шатанд анхаарал суларч, мэдээллийг хүлээн авах болон сэтгэн бодох чадвар муудах зэрэг олон сөрөг дагаваруудыг бий болгодог гэдгийг Замын цагдаагийн албанаас мэдээллээ.
Иймд жолооч та согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхыг анхааруулж байна.