Дорнод аймгийн Чулуунхороот суманд иргэд автомашины тормозны системийг хөлдөж, царцахаас сэргийлэх зориулалт бүхий үл мэдэх шингэн уусны улмаас иргэн Д.Т нас барсан хэрэг гараад байгаа билээ. Тэгвэл уг хэргийг Дорнод аймаг дахь Цагдаагийн газарт шалгаж байгаа аж. Энэ төрлийн хэргээс урьдчилан сэргийлэх чиглэлээр Дорнод аймаг дахь Цагдаагийн газраас тус аймагт үйл ажиллагаа явуулдаг “Дачин тамсаг”, “Шинь шинь”, “Шан-лун” ХХК-ийн үйлдвэрлэлийн бааз болон туслан гүйцэтгэх тээврийн ангиудад мэдэгдэл хүргүүлжээ.
Туслан гүйцэтгэгч тээврийн ангиудын ажилтан, жолооч нарын 82 иргэнд гэмт хэрэг, эрх зүйн зөрчил, хөдөлмөр хамгааллын аюулгүй ажиллагааны дүрэм, Замын хөдөлгөөний аюулгүй байдлын тухай хууль, Гэмт хэргээс урьдчилан сэргийлэх тухай хуулийн талаар мэдээлэл хийж, баталгаа гаргуулсан байна.
