Засгийн газрын өчигдрийн хуралдаанаар МСҮТ-д суралцаж буй оюутнуудад олгох тэтгэлгийн хэмжээг 200 мянган төгрөг болгох шийдвэр гаргалаа.
Энэ жилийн улсын төсөвт МСҮТ-д суралцаж байгаа оюутнуудын тэтгэмжийн хэмжээг 200 мянган төгрөгөөр тооцож олгохоор 79 тэрбум төгрөг тусгасан байна. Улмаар тэтгэмжийн хэмжээг 200 мянган төгрөгөөр шинэчлэн тогтоолоо.
Энэ тухай ХНХ-ын сайд С.Чинзориг "Засгийн газрын хуралдаанаар МСҮТ-д суралцаж байгаа залуусын тэтгэмжийн хэмжээг нэмэгдүүлэн тогтоох, журамд өөрчлөлт оруулах асуудлыг дэмжлээ. Ингэснээр нэгдүгээр сарын 1-нээс эхлээд тэтгэлгийн хэмжээг хоёр дахин нэмэгдүүлж 200 мянган төгрөг болголоо. Мөн МСҮТ-д суралцаж байгаа иргэдэд нас харгалзахгүйгээр тэтгэлэг олгох журмыг оруулсан ч эргэж харах нь зүйтэй гэж Засгийн газраас үзлээ" гэв.
МСҮТ-д суралцаж байгаа 45 хүртэлх насны иргэдэд 200 мянган төгрөгийн тэтгэлэг олгох бол 60-аас дээш насны иргэдэд тэтгэлэг олгох нь зохимжгүй гэж үзжээ.
