Н.Марал 
“Дэлхийн зөн Монгол” олон улсын байгууллага нь НҮБ-ын Гамшгийг бууруулах Олон Улсын стратегийн байгууллагаас санаачилсан “Гамшигт тэсвэртэй хотуудыг бий болгоё” уриан дор хот, суурин газрын гамшгийн эрсдэлийг бууруулах, түүнийг даван туулах чадавхыг бэхжүүлэх хөтөлбөрийг түгээн дэлгэрүүлэх “Гамшгийн эрсдэлийг олон нийтийн оролцоотой бууруулах” үндэсний хөтөлбөрт хувь нэмэр оруулах үүднээс “Гамшигт тэсвэртэй хотууд” төслийг орон нутагт анх удаа Орхон аймагт хэрэгжүүлж байгаа билээ.
Төслийн хүрээнд Онцгой байдлын ерөнхий газраас “Дэлхийн зөн Монгол” ОУБ, МУЗН-тэй хамтран гамшгийн менежментийн багийн гишүүдийг чадавхжуулах сургалтыг зохион байгууллаа.
Сургалтад төсөл хэрэгжиж буй Баян-Өндөр сумын 6 баг, Онцгой байдлын газар, Эрүүл мэндийн газар, Боловсрол, соёл урлагийн газар, Гэр бүл, хүүхэд залуучуудын хөгжлийн газрын нийт 100 гаруй алба хаагчийг хамруулан, сургагч багшийн гэрчилгээ гардууллаа.
Эдгээр сургагч багш нар нь орон нутгийнхаа иргэдэд гамшгаас хамгаалах, урьдчилан сэргийлэх чиглэлээр сургалт зохион байгуулах юм гэж Онцгой байдлын ерөнхий газраас мэдээллээ.